個多月來，「巴．不得」有很多次行動。不過因為無有時間就未update大家，而家寫住part one比大家睇下先。
8月22日，寫信去交通組投訴。輾轉聽交通諮詢委員會既王太話，交通組自稱係執行部門，唔會理我。結果梗係無回信啦。
8月28日，聽講話交通組處會有平D既車票賣，於是去睇下啦。搵左一輪先發現交通組個office係保安組（大學正門，大埔道入口）下面，名副其實係「地下組織」。就來開學，原來到左28日都仲未印好D車飛喎。而且交通組開工時間朝九晚五，D Canteen員工收工收九點，唔知點買平飛呢？
9月1日，各位都未開學，不過一班員工已經要準時返工。大把工友上車先知要比錢，完全唔通知佢地。
9月3日，「巴．不得」見學校講極都唔聽，又唔理我地，覺得都係要做D野。於是係大家開學既3號，晨咁早係火車站派傳單，嗌大聲公。原來個大聲公要就咁用手揸住嗌，嗌左幾個鐘，隻手於是又大力左。個日有好多同學入宿，個個拖住行李都要騰出一隻手攞證，煩死。
9月4日，朝早繼續嗌。午間係文化廣場再加個spot嗌。同日，下午四點幾，去百佳買左一排特強味既史立消。
9月5日，個大聲公似乎無咩電，特登換過八粒新既C電落去啦。點知嗌左半個鐘度發現佢無左聲，無理由架？明明係新電來架喎！一打開個蓋，原來係新電電流過大，機身發熱令到電阻急升，於是無電。唯有用中三學到既物理常識急救：於就近既7-11買入冰水一枝及紙巾一包，以水抹下降溫。點知一滴水落去，竟然熱到即刻出煙！連大聲公都出煙，今次加價真係天地不容。
9月10日，新增左「SMS意見反映」。有smartone同3台比大家選擇，SMS來講下自己對新措施有咩不滿，「巴，不得」將佢地貼係文廣。
9月13日，「巴．不得」發起網上聯署，到今日止有一共1200人簽名，加埋在地搜集到的600個，人數不少。有很多都是校友，佢地第一關心外判工既福利；第二關心中大會唔會變成無良大學；第三，身為校友番「母校」都要比錢，多少有D唔份氣。
9月14日，「巴．不得」係火車站派出「反對車票」，黃色的小紙片上寫住反對字句，請大家投入校巴既車費箱。個箱係車上，你放咩入去佢就係咩，你放車票就令佢成為車票箱；你放廢紙佢就成為垃圾桶；你投下反對票，佢就成為抗議渠道。
